نصوص مسرحية
المؤلف :
نضال6532
عنوان النــص :
الأميرة لؤلؤة (أوبريت-طفل)
نصوص :
أوبريت
الأميرة لؤلؤة
عن قصة " أميرة السكر"
للكاتب السورى نجيب كيالى
تأليف/ نضال6532
المشهد الأول
(دكان لعب أطفال.. البائع يضع دمية جديدة على رف وحدها ، وهو يتأملها بإعجاب)
البائع : صحيح أميرة.. قدمك سعد علينا
بس يعنى إزاى ماجبتش إلا واحدة؟
أما أنا صحيح مغفل !!
استنجلينا !!
أنت ناسى.. ولا ناسى
ماكنشى فيه غيرها هناك..
آه صحيح (يوجه حديثه للعب على الرف المقابل)
خلوا بالكم م الأميرة
هييه.. خلوا بالكم
أوعوا مرة حد منكم (يتهددهم)
والله أبعكم فى ساعتها.. وبأرخص تمن
أنتوا سامعين و لا لأه؟
الجميع : ليه بقى.. هيه نغه ولا نغه
ولا كنا يعنى كخه
البائع : أنا مش عايز مقاوحه.. اللى أقوله هاتسمعوه
غصب عنكم تنفذوه.. من غير مناقشة
الجميع : غصب عنا.. هيه ناقصة و لا ناقصة؟
البائع : (يتراجع) يعنى قصدى..مش غصب عنكم..
أنتوا ليه مجرور شكالكم
تاخدوا بالكم م الأميرة
البغبغان : تاخدوا بالكم م الأميرة !
البائع : قول لهم يابغبغان.. أنا بأقصد إيه
لجل يفضل ودنا ف التمام.. و لا إيه؟
البغبغان : ودنا ف التمام.. و لا إيه !!
البائع : أيوه قول.. بس ماتلتش وتعجن.. وترزينا
البغبغان : أنا ألت.. أنا أعجن.. هو أنا قرد.. و لا أنا ياصاحبى قرد؟
الجميع : هق هق هق (يضحكون)
البغبغان : عندكم حق.. اضحكوا.. هق هق هق
البائع : وقعونى فيك ياصاحبى.. وبقيت غلطان لوحدى
بس مايقعشى إلا شاطر.. و أنت فاهم
البغبغان : مايقعشى إلا شاطر
الجميع : اللى عايزين نعرفه.. أنت ليه ميزتها
وعلى رف وضعتها.. زى ملكة أو أميرة.. عزلتها بعيد عن أيدينا؟
هيه كانت أحلى منا.. و لا كانت أغلى منا
البائع : كل واحد منكم خد له.. دور يا صاحبى
أنت ناسى.. يوم ماجيبتك كنت فين؟
كنت وحدك على رف..وأنت.. وأنت.. وأنت برضه ياسى زفت
البغبغان : هق هق.. ياسى زفت.. أنت أنت (يلوح تجاه الديك)
الديك : أنا زفت.. والله ما أدن.. م الساعة دى
راح أبيض.. وابقى شوف لك حد غيرى
البائع : أنت شر (يقصد البغبغان) وقعتنى فى حبيبى ديكى
أبو عرف جميل وشيكى
وأنا أقدر على زعله.. دى حبيبى..
الادان من بقه إيه.. ياجماله
الجميع : يعنى ماتقصدتشى..يعنى (بتردد) تميزها علينا
البائع : والله أبدا.. كل واحد منكم.. له معزة جو قلبى
البغبغان : جو جيبى
البائع : أنا قلت يابنى جيبى و لا قلبى؟
البغبغان : أنا قلت يابنى جيبى.. ولا جيبى
البائع : العوض عليك خلاص
أنا ماشى ياحبايبى.. مش هاوصيكم بقى (يتحسس الأميرة)
و أنت بالذات ياأروبة (يقصد البغبغان)
أعمل إيه.. برضه باحبك.. يللا باى (يخرج)
المشهد الثانى
الرف المقابل لرف الأميرة عليه دمى كثيرة للنمر والدب والبغبغان
والديك وغيرها.. الدب والنمر فى حالة غيظ من الأميرة
النمر : خلاص.. مش قادر ياناس
أنا هاتجنن خلاص
الجميع : إيه.. فيه إيه؟
النمر : ليه بقى البياع صاحبنا
ميز المدعوقة عنا
حطها على رف كامل
واحنا سابنا.. زى مااحنا
على رف.. زى سردين جو علبة
هيه كانت أحلى منا.. و لا كانت...
البغبغان : هيه كانت أحلى منا و لا كانت
الدب : اسكت أنت.. أنت سامع
البغبغان : اسكت أنت.. أنت سامع
الدب : أنت هاتتؤز عليه.. و الله أهشك
وأنت عارف
هشتى ابدا ماتعرف..فين قفاك ولا فين يا صاحبى يبقى وشك
البغبغان : فين قفاك ولا وشك
ودى تيجى.. أنا مش مستغنى عنى
النمر : طبعا أحلى.. أنت إيه
نفسى يابنى تنسى مرة الحمورية
أنت مش شايف يادبدب
و لا يعنى نور عينك من بدرى شطب
القرد : أيوه أحسن..
حاجة إيه..جديدة خالص
لابسه توب أبيض جميل.. زى زينة المجالس
الدب : واحنا إيه..إيه؟
النمر : قديمنا خالص
حتى ألواننا الجميلة
قصدى يعنى.. اللى كانت يوم جميلة
بهتت.. وانطفى نورها خالص
البغبغان : روبابيكا.. روبابيكا
النمر : (يلكزه بغيظ) اخرس أنت..
ما أنت برضه روبابيكا
ولا فاكر إيه فى نفسك؟ اسكت.. أنا شايف حد جى
(تدخل مجموعة من الأطفال.. طفل وأمه)
الطفل : (يتأمل الأميرة) ماما.. ماما
الأم : إيه.. فيه إيه؟
الطفل : شوفى ماما (يشدها إلى الأميرة)
الأم : إيه جميلة.. مش كده؟
الطفل : جميلة خالص.. هاتيهالى
الأم : غالى والله.. وطلبك برضه غالى
الطفل : ماما.. بتبص لى وتضحك ياماما
شوفى شوفى دى هاتنطق
الأم : الله عليها (الأميرة تمد يدها وترمى قطعة سكر)
الطفل : (يلتقط القطعة) سكر.. حاجة تهبل (يتذوقه) الله..طعمه حلو
الأم : أما والله حاجة إيه
أنا هاشتريها لو تكون حتى بإيه
لأجل خاطرك
الطفل : الله.. حتى السكر طعمه جميل
أبدا عمرى ما دقت حلوته
مرة فى بيتنا و لا بيت غيرنا
الدب : موت بغيظك..فك نفسك
وبلاش التكشيرة ديه
النمر : أنت عاجبك الزباين و لا عاجبك الزباين
و لا واحد منها هوب بص بصة بص لينا
البغبغان : ولا بص مرة لينا
الدب : فى قلبى غصة
القرد : (يحاول إثارة الاهتمام) أنا هنا
أنا هنا أجدع أمير
فى الشقلبة ماليش مثيل فى الحركنة كنت المشير
نسل قرود مفيش كلام وياما ياما دريت الآم
فقر أفقر.. والسلام فى الرقص أسطى وخطير
بس يطلب منى صاحبى !!
الأم : (تتحدث مع البائع) بس تسمح يا أمير
البائع : تحت أمرك يامدام
الأم : الحلوة دى عايزه أشتريها
البائع : اعذرينى يامدام
المحل مفيهشى غيرها
الأم : والعمل؟
البائع : كلها أسبوع ياهانم
ولا حتى أسبوعين
راح يجى لى منها ياما
وساعتها تمام ياهانم
راح أوصلها بنفسى
لو يكون البيت دا فين
الطفل : (الأميرة ترمى قطعة سكر فيلتقطها الطفل) أنا مش منقول ياأمى
إلا بيها
البائع : على عينى يابن عمى
الأم : هاشتريها
أى سعر تحدده.. مش خسارة والله فيها
البائع : بس أعمل إيه ياهانم
أنا قلت ع اللى عندى.. ع اللى فيها
وحضرتك فهمانة قصدى
النمر : شوفوا.. شوفوا
الزباين كلها.. جرى وقفت عندها
آه يانارى
ياحظها
الدب : يا خسارتك يا صاحبى
امته تكبر
امتى هاتبطل حسد
طب دا حتى وجودها خلى للمكان ده طعم حلو
وريحة حلوة.. وشكل حلو
الأم : (وهى تتجه للخروج والطفل يبكى) مش هاوصيك والنبى
البائع : دا شغلى ياهانم.. حد يكره
بمشيئة ربنا.. ساعة ماتوصل
راح أكون ع الباب فى ثانية..
بالسلامة.. ألفين سلامة
(مجموعة أطفال يحيطون بالأميرة) حاسبوا حاسبوا
الأطفال : مش هانمشى إلا بيها
البائع : أنا قلت اللى عندى
ارحمونى
آه ياقلبى.. (ينظر للأميرة) كله منك
زى بعضه.. أنا عارف غصب عنك
وأنت ذنبك إيه ياحلوة؟
الأطفال : أرجوك ياعمو
البائع : كلها أسبوع وتيجى
وساعتها
راح أوصلها بإيدى
الأطفال : طب يومين..
يومين كفاية
البائع : كان بودى.. وأنا أكره
الأطفال : باى ياعمو.. كل واحد منا واحدة
طفل1 : أنا واحدة !!
طفل2 : وأنا واحدة
طفل3 : وأنا شارحه
طفل4 : وأنا زيه.. مش هاوصيك ياعمو
طفلة1 : أوعى تنسى؟
طفلة2 : والنبى أرجوك ياعمو
طفلة3 : عنوانى عندك
البائع : ماشى.. ماشىعلى عينى
كل واحدة وكل واحد له أميرة
بس تدونو الأسامى وعناوين السكن.. وبخط تشوفه عينينا (يخرجون وهو وراءهم)
النمر : حتى صاحبنا خلاص.. مخه طار
الدب : الجمال يابلم.. والحلاوة ياصنم
البغبغان : يابلم والحلاوة ياصنم
النمر : الرجل صعبان عليه
والله أنا خايف عليه
شوفوا شوفوا.. بصوبصو
الدب : يعمل إيه.. غصب عنه
من شقى طول النهار.. أنا شايفه بيستجار
ولا باع.. و لا اشترى
الأميرة واقفة حالنا
وواقفة حاله ليل نهار
النمر : أنا ذنبى إيه بقى؟
يمنع الأطفال تشفنى أو أشفها
الدب : ما أنت عارف
جية الأطفال لمين؟ يالئيم
النمر : أنت إيه.. عملى الرضى
عامل لى زى ناقر.. ونقير
الدب : أنا زى ما أنت عارف
عمرى ماحبيت أغالط
القرد : بص شوف سد البيبان
سدها فى وش الزباين
حرمنا من نور الميدان
واللى مخفى واللى باين
الدب : عنده حق
القرد : كسر حقك.. أنت إيه.. ديدبان؟
(ثلاثة زبائن مصممون على الدخول)
البائع : أرجوكم.. ارحمونى
الثلاثة : هيه نظرة.. بس واحدة
البائع : ارجوكم.. ارحمونى
الثلاثة : مش هانتأخر عليك
نظرة واحدة.. ودوغرى نمشى من سكات
البائع : على عينى.. على رمشى
عشر دقايق
بس هيه عشر دقايق لجل خاطرى
الثلاثة : ماشى ياعمو.. عشر دقايق
ودوغرى نمشى.. بس طمن قلبك أنت (يقتربون من الأميرة)
ابتكار مالوش مثيل
حاجة تهوس الصغير والكبير
الأول : صنع بره.. مش كده
الثانى : للأسف.. صنع بره
الثالث : أمتى مانطلعشى بره
البلد مليانة ياما
اسطوات فى كل حته
فى المصانع.. والمزارع.. والحارات..والصوامع
فى كل حته
الأول : صحيح.. امتى مانطلعشى بره
الثانى : البلد محتاجه نقلة
نقله واسعة
للعقول الغالية تنتج
تبتكر وتودى بره
الأميرة : (تمد يدها وتلقى قطعة سكر.. يقفز الثلاثة.. ينجح أحدهم فى
التقاطها)
الأول : هيه يا أميرة
واحدة ليه
واحدة حلوة
الدب : (يرفع مؤخرته الثقيلة ويحطها على الرف بقوة)
الثانى : يللا بينا..
الثالث : مش قبل مانغنى لها غنوة.
بس غنوة
الثلاثة : (يغنون للأميرة)
ياأميرة ياجميلة ياللى نورتى المدينة
ياما عشنا بيك نحلم.. بالسعادة للمدينة
قلبك المليان محبة.. زى نهر وفاض علينا
يسعد الفلاح بأرضه.. خيره يملى كفوف ايدينا
(الأميرة تلقى واحدة فيلقطها الأول)
الثانى : يللا..بكرة
أنا حليت الرسالة
م الليلة دى.. موضوع رسالتى
راح يكون عن الأميرة
هابدأه دلوقتى فورا.. يللا بينا
قبل ما يطير الكلام
يللا يللا (يخرجون)
الدب : سمعتوا.. ولا بتسمعوش ياحثالة
دول غنوا كمان ورقصوا.. و لا أحلا من غناهم
البغبغان : دولا غنوا.. و لا أحلا...
النمر : دى إهانة والله لينا!!
أيوه والله إهانة لينا
الدب : لمايجى الليل ويدخل المحل
لمايجى الليل و يبقى كل شيء
زى بعضه
أنا ها تسحب بسرعة
دوغرى أكون فى لحظة جارها
وهيه نايمة.. مش دريانه بيه
هيه ضغطه.. ضغطة واحدة
راح أخليها هريسة
قول بسيسة
النمر : (يهز رأسه) راح أسيب لك أمرها
تدبره.. زى ما تحب ياصاحبى
أنت عارف إنى مش باهتم إلا
بالفرايس الكبيرة
اللى تملى البطن ياما
وأنت شايف.. قد إيه هيه هزيلة
راح تليق لك
كل برغوت.. على قد دمه.. و لا إيه؟
الدب : يللا نام أنت وخنفر
لجل ماينام الجميع
الكابوس يخرج فى نفسك
ويلمهم زى القطيع
دوغرى يجى اللى اسمه إيه داهوه
ياخد الكل فى زفيره
أما أنا سهران ياصاحبى.. لجل ما انهى اللى فى دماغى
لجل ماتعود لينا السكينة
المشهد الثالث
فى دكان اللعب - ليلا
الدب بشويش راح أكون وياها
وف لحظة انفذ حيلتى
واخلص وارتاح واتباها.. قدام الكل بسيرتى
(يقترب من الأميرة ، يؤدى بعض حركات ضاحكة _ مايم _ يصعد جالسا فيتأرجح الرف
.. تستيقظ الأميرة)
الأميرة دبدب.. قلقان من إيه؟
الدب هأهأهأ.. خضيتك؟
الأميرة خضتنى.. أبدا والله ماخضتنى
هو أنت عليك سحنة تخض؟
و لا أنت عليك سحنة تخض
دا جمالك أهوووه.. فايق الحد
الدب جمالى.. مش قصدك يعنى الـ... اللى... فى الـ...
مش كده والله؟ (وهو يستعرض نفسه)
الأميرة اسمح لى أرحب بوجودك
وبرقة قلبك وودادك
خد منى تحمر خدودك
سكر هايدندش ف أنيابك (ترمى له سكرة فيلتقطها بلهفة)
الدب فاكرة إنها حدقة ذكية
تضحك بهدية عليه
والله لا هاخليها تندم وتلالى وتسترحم فيه(يكشر عن أنيابه ويدنو فجأة يتوقف)
ياربى.. معقول النور طالع منها
ودى بسمة إيه دى اللى ف عينها
كأن البدر طلل منها
شايفين الدنيا حولينا حورية بتتباها بنورها
الأميرة (ترمى سكرة أخرى فتنزل على رقبته)
الدب الله الله.. أنا فرحان.. ومظأطط مش عارف ليه
ولو إنى بالشر ملان.. وبنية خبيثة عارفنها
ما أعرفشى جرى لى اللى جرى لى
أكيد البنت دى سحر لى
الأميرة قلبى فرحان عشانك.. يابو الدباديب
الدب وقلبى فرحان علشانك.. والنبى ياطبيب
الأميرة أنا فرحانة بصداقتك وبحسن سؤالك
الدب وأنا برضة فرحان بكلامك واستقبالك
ياما نفسى تحكى لى حكايتك.. وحياة النبى قولى ياأميرة
خلينى أتباها بمعرفتك.. و أنام وأبات كده على سيرتك
الأميرة (ترمى قطعة سكر) أنا زى الحال ما أنت شايفنى
لعبة مصنوعة فى المصنع
على شكل أميرة بتعرفنى
وأعرفها الحلوة وتعرفنى
الدب أميرة حلوة ودلوعة؟
الأميرة اسمها لؤلؤة.. ومتزوقة.. بحب الناس
وحيدة مابين أبوها وأمها.. قمر وناس
أبوها ملك له شنة ورنة يهيهيووووه
الدب هيه وبعدين يا حلو يا زين
الأميرة إيه رأيك لو.. غيرنا الجو.. ورحنا على جزيرة النو
الدب بنا عليها لجل نشوف حدوته من وسط ألوف
للبنت الحلوة السنيورة أميرة السكر و نطوف
على شط البحر المكشوف
الأميرة مش أحسن لو صحيو الإخوان
وسفروا معانا.. وعرفوا معانا
اللى حصل.. و اللى كان
مع الأميرة لؤلؤة الزمان
الدب (يسرع ويخبط أصحابه) اصحى.. اصحى.. يللا أمال
قصة جميلة.. وعال العال
فوق.. روق.. يللا أمال
هيص ميص.. قرب منى
قصة جميلة أزرق بنى
هاتمتعنا وتعرفنا
هاتودينا وتروحنا
وتعلمنا جديد فى جديد
لما شموع العقل تقيد
اصحى يانايم ياغفلان
العلم محتاج صحيان
المشهد الرابع
فى مدرسة _ فصل لؤلؤة
بنت 1 : ودى جاية ليه هنا
بنت2 : ومكانها مش هنا
بنت 3 : أكيد تاخد حاجتنا وتسرق زى أبوها ماساب للفقر بيتنا
بنت 4 : ياريت تكون أمينة
بنت1 : ياريت.. دى اتربت فى القمينة
من إيد الظلم شربت.. وبايد الظلم اكلت.. أكيد دى بتعادينا
الأميرة : (تدخل بين خوف البنات مبتسمة تلقى بقطع السكر على الجميع)
تحية منى لكم ياصحبة وردة حلوة
بحياتى أفتديكم يابنات بلدى ياغنوة
البنات : لؤلؤة زهرة حلوة فى أرض ملانه شوك
واحدة : معقول؟
البنات : ياما وياما قولنا عنها كلام كتير
ثانية : ظلم أبوها شغلنا.. وزود فى ظنوننا
ثالثة : وهيه بنت حلوة.. رقيقة زى نسمة
البنات : ليها أم جميلة خالص.. أكيد تشبهها خالص
وماتشبهشى أبوها
الأميرة : الله ياولاد بلدنا لو كلمة حب تعلى
وتصبح القانون
الرزق هايبقى أحلى وحياتنا تبقى سهله
مفيهاش ريحة الظنون
أنا عندى ليكو فكرة
البنات : قوليها لنا يا أميرة
الأميرة : لاخوتنا وابهاتنا
البنات : لكل الصيادين؟
الأميرة : لكل الصيادين
البنات : ومستنيه إيه؟
الأميرة : محتاجه الفكرة خطة وكلام ويا الكبار
البنات : قصدك
الأميرة : أمور كتير كتير محتاجة منا صبر
عشان الدنيا تحلى والعالم يبقى أغلى
البنات : والظلم اللى محاصرنا ومعشش جو بيتنا؟
الأميرة : الظلم عمره ساعة مش أكتر صدقونى
البنات : يعنى؟
الأميرة : نسيب للظلم ظلمه نسيبه ياكل فى بعضه
ونساعده ع النهاية
البنات : نساعده ع النهاية؟
الأميرة : نساعده ع النهاية
البنات : بس الكبار خلاص راسمين يوم الخلاص
وهمه أدرى منا باللقمة والمداس
الأميرة : ياريت نقدر نحوشهم ونهدى غضب نفوسهم
البنات : ياريت.. ياريت.. ياريت !!
المشهد الخامس
فى المدينة _ جماعة من الصيادين مجتمعين
رجل1 : مفيش قدمنا حل
رجل2 : مفيش غير حل واحد
رجل3 : صبرنا كتير وياما وقلنا بكرة يرجع
عن ظلمه عن أذنا لكنه زاد وبرطع
رجل4 : نشقى ليل نهار وشقانا ياخده منا
وبيوتنا بتستجار ودموعها بتشكى حالنا
عيالنا عايشة لايصة و لا لاقية حتى لقمة
أو هدمة نضيفة لابسه ترد البرد عنا
رجل5 : وياما ياما قولنا احنا ولادك ياسيدنا
لابسنا هدمة ماشى اكلنا لقمة ماشى
لكنه سد ودنه وزاد ياناس فى ظلمه
رجل1 : مفيش حل إلا موته
رجل2 : وضرب كمان جنوده
رجل3 : ودا حل وحيد ولازم
رجل5 : نتعاهد يللا نخلص نتعاهد يللا نخلص
رجل1 : وكل الناس معانا
رجل2 : فى اللى احنا نقول عليه
الرجال : (سوية) زى ما اتفقنا.. ننفذ اتفاقنا
المشهد الأخير
الأميرة : بصى شوفى يا أمى بصى شوفى الشوارع
الأم : خايفين منك يا بنتى م الدم اللى فى إيديهم
الأميرة : خايفين منى أنا؟
الأم : تار أبوك اللى فى رقبتك
الأميرة : تفتكرى يا أمى هاقدر
الأم : والله منك أزعل.. دا مهما كان أبوك
الأميرة : قتلهم ألف مرة.. يا أمى ليه بتنسى
الأم : قولى لى إزاى قتلهم؟
الأميرة : جوعهم ليل نهار.. لما الكل استجار
لبسهم خيش وفل
وهمه صيادين فى اللؤلؤ والمحار
الأم : ولو.. الدم دم أبوك
الأميرة : والناس أهى خايفة منى.. قافلة عليها البيبان
الأم : من عمايلهم يابنتى
الأميرة : اليوم أنا ناوية أخد تارى من المدينة
: ومدافع جيشى واقفة
فى كل حته فيها
وفى لحظة تكون أوامرى
تهدم كل اللى فيها.. مدارسها.. مبانيها
الأم : حرام تاخدى المدينة بظلم جماعة منها
الأميرة : مش عايزه تار أبويا؟
حالا هاجيب خبرها
ما هاخلى حتة منها
سليمة تشكى حالها
الأم : بلاش يابنتى تار
كفاية اللى جرى لهم
الأميرة : كان صياد زيهم
وميز نفسه عنهم
يشقوا وياخد عرقهم
الأم : عايزاكى يالؤلؤة بالعدل مزوقة
الناس تجرى عليك ترتاح بعد الشقا
الأميرة : التار لو من عدو لو بعد إيه أجيبه
لو حدت عنه أبقى خاينة لبلدى وتاريخى
ولا ممكن يوم أسيبه
المشكل إن تارى.. عند شعبى وناسى
أجيبه إزاى وهمه مصدر حكمى وضميره
دلوقتى أدى أوامرى
لجنودى وعساكرى
الأم : بلاش.. بلاش يالؤلؤة.. بلاش
الأميرة : مفيش بلاش ياماما.. أبدا مفيش بلاش (تعطى الأوامر) اضرب
الأم : فى لحظة عصيت أمك.. فى لحظة هدمت بلدك (أصوات المدافع يعقبها تهليل فرح)
أصوات : سكر
: سكر
: سكر (تدخل جماعات الناس بنون وبنات وتغنى)
مدافع الأميرة ضربت كل المدينة
باللولى والمحار
نزل السكر علينا دايب من حبه لينا
وروق العكار
مع كل سكرة عروسة منورة
وشمعة ماتنطفيش بالليل أو بالنهار.. سهراية وسكرة
عاشت لؤلؤة أميرة فزدوقة تملى قلوبنا عمار
(تظهر الدمى وتحيط بأميرة السكر وتهتف)
الدمى : عاشت أميرة السكر.. عاشت الأميرة لؤلؤة (يحملونها ويضعونهاعلى الرف بأنفسهم)
ســـــــــــتـار//
تأليف/ نضال6532
الأحد سبتمبر 18, 2011 7:45 pm